27. mars 2020
Stjórn UNICEF á Íslandi hefur ráðið Birnu Þórarinsdóttur í stöðu framkvæmdastjóra félagsins.
„Stjórn UNICEF lagði áherslu á faglegt og vandað ráðningarferli. Sérstök valnefnd á vegum stjórnar naut liðsinnis ráðgjafa Capacent. Alls sóttu 81 um starfið og margir í þeim hópi voru ríkir af hæfileikum og reynslu. Endanleg ákvörðun var loks tekin samhljóða á fundi stjórnar síðastliðinn mánudag og við erum afskaplega ánægð með niðurstöðuna. Birna býr að reynslu, menntun og hæfileikum sem gera hana kjörna í starfið,” segir Kjartan Örn Ólafsson, stjórnarformaður UNICEF.
Birna er stjórnmálafræðingur að mennt, með meistaragráðu í alþjóðlegum öryggismálum frá Georgetown-háskóla og MBA gráðu frá Háskólanum í Reykjavík. Hún hefur víðtæka stjórnunarreynslu og fagþekkingu á starfi Sameinuðu þjóðanna. Birna hefur starfað sem framkvæmdastýra landsnefndar UN Women (þá UNIFEM), yfirmaður verkefnaskrifstofu UN Women í Serbíu og Svartfjallalandi og framkvæmdastýra Evrópustofu. Hún hefur unnið sem ráðgjafi fyrir alþjóðastofnanir og utanríkisráðuneytið og kennt öryggismál og starfsemi alþjóðastofnana á háskólastigi. Frá árinu 2016 hefur Birna starfað sem framkvæmdastjóri Viðreisnar.
„Ég er þakklát fyrir að vera treyst fyrir hinum krefjandi verkefnum framundan,“ segir Birna. „Starfsemi UNICEF á Íslandi skiptir gríðarmiklu máli, bæði fyrir réttindi barna á Íslandi og hag og heilsu milljóna barna um allan heim, þar sem gjafir heimsforeldra og annarra vildarvina UNICEF skipta sköpum. Nú á tímum COVID-19 eru verkefni UNICEF í þágu heilsu og réttinda barna á heimsins hættulegustu svæðum brýnni en nokkru sinni fyrr. Ég hlakka til að takast á við áskoranirnar framundan með því frábæra teymi sem starfar hjá UNICEF.“
Birna tekur við starfinu af Bergsteini Jónssyni sem hefur starfað hjá UNICEF í fjórtán ár og gegnt starfi framkvæmdastjóra síðastliðin sex ár.
„Undanfarin ár hafa einkennst af markvissri og árangursríkri uppbyggingu samtakanna. Stjórn og starfsfólk UNICEF á Íslandi þakkar Bergsteini fyrir að leiða það góða starf og býður um leið Birnu hjartanlega velkomna til starfa,” segir Kjartan Örn.