04. apríl 2019

Brugðist við útbreiðslu kóleru í Mósambík

UNICEF, í samstarfi við Alþjóða heilbrigðisstofnunina (WHO), hóf í gær umfangsmikið bólusetningarátak gegn kóleru í Mósambík. Bólusetningarátakið mun ná til 900.000 manns og er eitt stærsta bólusetningarátak gegn kóleru sem UNICEF hefur ráðist í.

UNICEF, í samstarfi við Alþjóða heilbrigðisstofnunina (WHO), hóf í gær umfangsmikið bólusetningarátak gegn kóleru í Mósambík. Bólusetningarátakið mun ná til 900.000 manns og er eitt stærsta bólusetningarátak gegn kóleru sem UNICEF hefur ráðist í.

Frá því að fellibylurinn Idai reið yfir sunnanverða Afríku hafa UNICEF og samstarfsaðilar keppst við að stöðva útbreiðslu kóleru sem smitast hratt við neyðaraðstæður sem þessar. Nú þegar eru yfir eitt þúsund staðfest smit og er ástandið einna verst í hafnarborginni Beira í Mósambík. Frá því að fellibylurinn reið yfir hafa UNICEF og samstarfsaðilar lagt kapp að bæta aðgengi að hreinu vatni og hreinlætisgögnum og koma upp læknisaðstöðu til að sinna þeim sem hafa smitast af sjúkdómnum. Það var því mikið ánægjuefni þegar byrjað var að bólusetja fyrstu börnin gegn sjúkdómnum í gær.

„Fellibylurinn kann að vera yfirstaðinn en eyðileggingin er svo gífurleg að Idai mun hafa áhrif á líf hundruð þúsunda barna til lengri tíma. Innviðir eru í rúst, hundruð þúsunda hafa misst heimili sín og vatnsveitukerfi, brýr og vegir hafa gjöreyðilagst sem hefur gert hjálpastarf mun erfiðara. Það er því mikilvægt að hefja uppbyggingu strax,“ segir Steinunn Jakobsdóttir, upplýsingafulltrúi UNICEF á Íslandi.

Talið er að yfir 3 milljónir manns þurfi nauðsynlega hjálp í Mósambík, Simbabve og Malaví, þar af um helmingurinn börn. UNICEF á Íslandi stendur fyrir neyðarsöfnun til að bregðast við hamförunum og styðja neyðarviðbrögð UNICEF á svæðinu. Hægt er að styðja söfnunina hér.

Kólera er bráðsmitandi þarmasýking og dreifist til að mynda með menguðu vatni. Við erfiðar aðstæður sem þessar er mikil hætta á að smitsjúkdómar á borð við kóleru breiðist hratt út. Kólera getur verið banvæn, sérstaklega ungum börnum, en með réttri meðhöndlun ná börnin sér þó á undraverðum tíma og því mikilvægt að sinna fræðslu og forvörnum sem og að tryggja aðgengi að heilbrigðisþjónustu. Bólusetningarátak UNICEF og WHO felur meðal annars í sér að:

  • 900.000 skammtar af bóluefni eru komnir á vettvang og byrjað er að bólusetja börn gegn sjúkdómnum;
  • Áhersla er lögð á að koma í veg fyrir útbreiðslu sjúkdóma með fræðslu og dreifingu á vatnshreinsitöflum, hreinlætisvörum og öðrum hjálpargögnum.

„Bólusetningarátakið er eitt af mörgum inngripum UNICEF og samstarfsaðila til að sporna gegn útbreiðslu kóleru,“ segir Michel Le Pechoux, talsmaður UNICEF í Mósambík. „Auk þess er verið að laga vatnsveitukerfi, dreifa vatnshreinsitöflum og viðbragðsteymi veita fræðslu um hvernig eigi að þekkja einkennin og hvernig fjölskyldur geta verndað sig gegn smiti, til dæmis með auknu hreinlæti og bólusetningum.“

Ljóst er að hamfarirnar hafa kostað fjölda mannslífa og mikið verk er fyrir höndum næstu mánuði til að tryggja öryggi barna. UNICEF er á vettvangi og hefur þegar hafið umfangsmiklar neyðaraðgerðir. Í forgangi er að tryggja öryggi og heilsu barna og útvega þeim hreint drykkjarvatn, hreinlætisaðstöðu og næringu. Einnig er lögð áhersla á að sameina börn fjölskyldum sínum.

Þá vinnur UNICEF náið með yfirvöldum að því að veita þeim sem komist hafa í skjól í hjálparmiðstöðvar hreint vatn, heilbrigðisþjónustu og hreinlætisaðstöðu, auk þess að tryggja áframhaldandi menntun barna á skólaaldri með því að setja upp bráðabirgða námssvæði á barnvænum svæðum og dreifa skólagögnum.

Neyðin er gífurleg og því biðlar UNICEF á Íslandi til almennings að styðja neyðaraðgerðir UNICEF í Mósambík, Simbabve og Malaví.

UNICEF á Íslandi stendur fyrir neyðarsöfnun til að bregðast við hamförunum og styðja neyðarviðbrögð UNICEF á svæðinu. Hægt er að styðja söfnunina hér.

Fleiri
fréttir

27. mars 2024

Níu ár af stríði í Jemen: Milljónir barna vannærð
Lesa meira

15. mars 2024

Þrettán ár af stríði í Sýrlandi: UNICEF aðstoðaði milljónir í fyrra en þörfin aldrei meiri
Lesa meira

13. mars 2024

Sögulegur árangur í baráttunni gegn barnadauða
Lesa meira
Fara í fréttasafn