Stríðið í Sýrlandi

Mikill straumur flóttafólks liggur nú frá Sýrlandi og á hverjum degi leita þúsundir barna og fjölskyldur þeirra skjóls í nágrannaríkjunum. Helmingur flóttafólksins eru börn. UNICEF, Barnahjálp Sameinuðu þjóðanna, er með mikinn viðbúnað á svæðinu, enda eykst neyðin stöðugt.

Söfnunarsímanúmerin eru opin:
908-1000 (1.000 kr)
908-3000 (3.000 kr)
908-5000 (5.000 kr)

Þú getur einnig styrkt hjálparstarfið um 1.500 kr með því að senda sms í símanúmerið 1900 og skrifa inn í það: unicef

Þú getur líka lagt söfnuninni lið með því að smella hér.

UNICEF leggur áherslu á heildrænar og samhæfðar aðgerðir og starfar bæði í Sýrlandi og í nágrannaríkjunum – Tyrklandi, Írak, Líbanon og Jórdaníu – þangað sem straumur flóttafólks hefur verið mestur. 

Áhersla er lögð á að ná bæði til barna í Sýrlandi og barna sem flúið hafa landið. Þörfin er gríðarleg og búist við því að hún eigi enn eftir að aukast.

Lífsnauðsynleg hjálp

Á meðal þess sem UNICEF hefur gert og/eða stutt til dagsins í dag innanlands í Sýrlandi er eftirfarandi:

- Hreinu vatni hefur verið dreift vítt og breitt um landið og til flóttafólks. Í dag nær UNICEF til yfir 8 milljóna manna með hreint vatn!

- Hreinlætisgögnum hefur verið dreift til yfir 100.000 manns sem hafast við í skýlum og opinberum byggingum víðsvegar um landið.

- Hátt í ein milljón barna hefur verið bólusett gegn lífshættulegum sjúkdómum, þar á meðal mislingum. 

- 20.000 pökkum með ungbarnamat hefur verið dreift til fjölskyldna á slíkum stöðum og 10.000 skyndihjálparpökkum.

- Barnafötum, teppum og skólagögnum hefur verið dreift til þúsunda barna og fjölskyldna þeirra.

- 50 hjúkrunarteymum hefur verið komið á fót. Þau eru með færanlegar heilsugæslustöðar og fara inn í hverfi þar sem öryggi er lítið og fólk er hrætt við að fara út úr húsi og á heilsugæslustöðvar eða sjúkrahús. Heilsugæslan er þannig færð inn í hverfið til þeirra.  

- Tugþúsundir barna sem sækja barnvæn svæði á vegum UNICEF hafa fengið sálfélagslegan stuðning og tækifæri til að koma saman, leika sér og fá að vera börn. Það er gríðarlega mikilvægt.

Þetta er einungis upptalning á atriðum innanlands í Sýrlandi. UNICEF er með yfirgripsmiklar aðgerðir í öllum nágrannaríkjum landsins – Tyrklandi, Jórdaníu, Líbanon og Írak – og sinnir viðamiklu hjálparstarfi í þágu flóttafólksins sem flúið hefur yfir landamærin.

Á dögunum sendi framkvæmdastjóri UNICEF, ásamt framkvæmdastjórum annarra stofnana SÞ sem sinna flóttafólki frá Sýrlandi, frá sér óvenjulegt ákall. Við hvetjum þig til að kynna þér málið.

Meirihluti þeirra sem nú þjáist í Sýrlandi eru börn. UNICEF, Barnahjálp Sameinuðu þjóðanna, hefur því þungar áhyggjur af stöðunni.