28. mars 2017
UNICEF á Íslandi og Kvika undirrituðu nýverið styrktarsamning til eins árs. Með samningnum er Kvika aðalsamstarfsaðili UNICEF á Íslandi á sviði bankaþjónustu, auk þess að vera sérstakur velunnari heimsforeldra. Á Íslandi eru vel yfir 25.000 heimsforeldrar og eru þeir hvergi hlutfallslega fleiri en hér á landi.
Kvika niðurgreiðir bankakostnað heimsforeldra og gerir UNICEF á Íslandi þannig kleift að nýta söfnunarfé sitt enn betur í þágu réttinda og velferðar barna. Kvika veitir UNICEF bestu mögulegu kjör á bankaþjónustu og skuldbindur sig til að styðja við fjáröflun UNICEF á Íslandi, bæði með beinum framlögum og öðrum samstarfsleiðum.
Það voru Bergsteinn Jónsson, framkvæmdastjóri UNICEF á Íslandi, og Hildur Þórisdóttir, markaðs- og mannauðsstjóri Kviku, sem undirrituðu samninginn.